കണ്ണൂർ: എൽഡിഎഫ് സർക്കാരിന്റെ മദ്യനയത്തിൽ സാധാരണ ജനങ്ങൾക്കുണ്ടായിട്ടുള്ള അസഹനീയാവസ്ഥ ഈ തെരഞ്ഞെടുപ്പിൽ വോട്ടർമാരിലൂടെ പ്രതിഫലിക്കണമെന്ന് കണ്ണൂർ കോർപറേഷൻ മേയർ പി. ഇന്ദിര.
കേരള മദ്യനിരോധന സമിതി ജില്ലാ കമ്മിറ്റിയുടെ ആഭിമുഖ്യത്തിൽ കാൾടെക്സ് ജംഗ്ഷനിൽ സംഘടിപ്പിച്ച തെരഞ്ഞെടുപ്പ് ഇടപെടൽ വിശദീകരണ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു മേയർ. മദ്യനിരോധന സമിതി കണ്ണൂർ ജില്ലാ പ്രസിഡന്റ് എ. രഘു അധ്യക്ഷത വഹിച്ചു.
സെക്രട്ടറി കെ.ജി. വർഗീസ്, സംസ്ഥാന വൈസ് പ്രസിഡന്റ് ആർട്ടിസ്റ്റ് ശശികല, സംസ്ഥാന സെക്രട്ടറിമാരായ ഐ.സി. മേരി, ടി. ചന്ദ്രൻ, പള്ളിപ്രം പ്രസന്നൻ, ഇംതിയാസ്, സൗമി മട്ടന്നൂർ, പദ്മജ സുരേഷ്, പി. നാണി, മധു കക്കാട് എന്നിവർ പ്രസംഗിച്ചു.